تتصوري ؟!!

وفضلت أدور ف الوشوش عن بسمة تشبه بسمتك

ومشيت طريق ما اخترتهوش علشان ما أعرف خطوتك

تتصوري إني نسيت صورة ملامحك ف الزحام

اتكسّرت كل الحروف , حاشت لساني م الكلام

وانتي اللي مادّالي الأيادي والمدى لون فرحتك

لكني ما قدرتش أنادي أو أقرب ناحيتك

مكتوب علينا نفترق

والحب فينا يتخن

قوتهون آهاتي ودمعتك

تتصوري ؟!!

إنتي وأنا ف غربة طريق موش عايزه تجمع شملنا

ضاع مننا الحب البريء والدمعة صاحبت حلمنا

واحنا اللي كنا بنزرع الأيام ورود متلونة

كل الشوارع يا حبيبتي بحبنا متعنونة

إتبخرت كل الأماني واختفى نور شمسنا

ما بقيتش عارف فين مكاني وانتي مين أو مين أنا

مكتوب علينا نفترق

والحب فينا يتخنق

والحزن يهدم عشنا

تتصوري ؟!!

كان نفسي يا كل المنى نرجع نعيد الذكريات

ليه نفترق ف المنحنى ونغرق ف بحر من الآهات

آه من زمن ما يهمهوش دمعة حبيبين لو بكوا

ولا يستمعش لشكوهم لو سهروا ليلة يشتكوا

لو بس نقدر نلتقي ونعوض العمر اللي فات

وتعودي ليا وتشرقي وتبددي حزن الساعات

مكتوب علينا نفترق

والحب فينا يتخنق

ويقيد الحب السكات

تتصوري ؟!!

رباعيات
بقلم علي أحمد عبد الله
1
قمر السما عالي وبعيد المنال
وانا ما امتلك إلا دموع تنهال
تاهت عيوني ف كون فسيح الحد
والقلب شايل م الهموم أحمال
2
كسَر الصراخ صوت السكات وانفجر
والظـلم لملم جنوده وانهزم واندحر
يا شعب ياللي السكات كاتم على نفسك
هييجي يوم تقدر تزيل الحجر
3
يا صاحبي فين من زمن إرجعلي باندهلك
الحزن فيّا اكتمن صدقني محتاجلك
الدمعة من غير تمن والخطوة مفقودة
والقلب داب م الشجن إرجعلي افضفضلك
4
كل الطيور رفرفت جوا الفضا العالي
وانا طير حبيس القفص أيام وليالي
أصدح وكل اللي يسمع يحسب اني سعيد
ولو عرف بلوتي يبكي على حالي
5
لملم خيوط عنكبوتك يا زمان الخوف
وفك قيد الأسارى من جمل وحروف
الكلمة سيف الغلابة ف وشك العابس
وبيت يلم الحيارى وعطف للمعطوف
6
أنا من زمان مرتحل والآهة زوادي
صورتِك يا حزن وأمل مرسومة بفؤادي
لو كان منايا اكتمل ما كنت يوم سِبتك
ومشيت طريق اتعمل علشاني جلادي
7
ماعرفش ليه كل الحاجات اتغيرت
معرفش ليه الضحكة فينا اتجمدت
وان يوم ضحكنا تطلع الضحكة بُكا
وان يوم بكينا نكتشف إنّ الدموع اتحجَّرت
8
رسمت أيادي الزمن فوق الجبين حكايات
تسرد مراحل حياتك ، توصف اللي فات
حكايات تضحك تبكي أهو كله كان مكتوب
على جبينك يا غافل عن خطى السنوات
9
نزل المطر غسل الشجر ف الشتا
فِرح الشجر ضم الطيور البردانين
شجرة فؤادي بحزنها ليه مُلفتة
شجرة فؤادي بحزنها ليه مُلفتة
مع إن ليها كتير كتير عاشقين ؟؟!!!!
10
رست مراكبي على شطِّك يا أوطاني
لقيت فيكي حروف اسمي وعنواني
واقسمت اني أعيش فيكي وأعيش ليكي
ما انا شاعر بأحزانك وأحزاني
11
يا سمرة يام توب اخضر وخصر نحيل
غُلبت ابعت مراسيلي وفاض الكيل
وقولة آه تهد جبال ومش قادر
أكون صابر على صدك وبالي طويل
12
كرباج بيلسع قفانا كل طلعة شمس
ظُلْمَك ياحاكم بأمرك النهارده وأمس
إمتى غيومك تفارق بسمة السموات
تشرق وتفرح تغني وتستريح النفس
13
دمع الندامة رسم فوق الخدود أنهار
أنهار بتسقي وتروي شماتة الغدار
وبإيه يفيد الندم بعد اللي صار ما صار
آدي جزاء اللي فضَّل صحبة الأشرار
14
قالت حبيبتي ف مرة إنتا أغلى الناس
وانتا اللي بتمدني بالحب والإحساس
أنا قلت إنتي عيوني اللي بشوف بيها
وإنتي روحي وإنتي الدم والأنفاس
15
يا ليل سَوادك بقا ف قلوبنا متغلغل
أصبحنا ياللأسف م الحق نتململ
الزيف مَلَك أرضنا ولبسنا ألف قناع
ورضينا إن الشيطان بقيوده نتكبل
16
كونك يا شاعر وسيع مالو مقاس ولا حد
اطلق حصان القلم من غير لجام ولا سد
حبرك بحار المعاني بكافة الألوان
ورقك غيوم السما إكتب وزيد الرد
17
قسوة قلوب البشر حنضل وعلقم
مُر تقفل بيبان الرجا و تفتح بيبان الشر
أنا قلت ربي كريم يصلِح لنا الأحوال
وينفتح حُضننا حُضن الصدف للدُّر
18
يا طبيب جراحي تعالى اوصف دوا لجرحي
ما بقيتش م العشق عارف ليلي من صُبحي
قال الطبيب الدوا ف وصال ما بعده فراق
قلت امتى يرضى حبيبي ويكتمل فرحي
19
أنا خدني من دنيتي عشق العيون السود
أصبحت تايه كأني ف الفضا مفقود
وندرت أعمل عيونك لِيّا محرابي
وافنى لغاية ما اكون موجود ومش موجود
20
كمال النفس ف التقوى
وف الإخلاص بقلب حنون
ومش كل العباد تِقوى
على الإخلاص لرب الكون
21
هانت عليك صحبتي يا مفارق الأحباب ؟
كل اللي بينا انتهى وأصبح سراب ف سراب ؟
أنا كنت ليك الوطن ترتاح ف أحضانه
ومنتظر رجعتك واقف على الأبواب
22
صبرت كتير وكان حملي عليا تقيل
ومين يقدر يدوق همي وعني يشيل
ويهجر كل أصحابه وخلانه
ويسهر كل يوم زيي ويبقى ذليل
23
رحى أحلامي دوارة تلِف الكون
وانا المسكون بأوهامي وانا المطحون
لقيت أيامي واخداني ف دوامة
وانا المحتاج لضِلاية وصدر حنون
24
آمنت بربنا المعبود إله واحد مالوش تاني
وبمحمد نبينا الزين محا شركي وأوثاني
وبالإسلام وبالإيمان وبالإحسان وقرآني
وجنة ربنا الواسعة تعوض كل حرماني
25
بركان بيرمي حمم قلبي يا متغرب
سيبك بقى م الألم خلّي الهنا يقرَّب
الرحلة دي للعدم واخداك بلا أوبة
وحبيبك اللي ظلم منك بيتهرَّب
26
نعش الشهيد اللي ضحى لاجل غيره يعيش
طاير بعيد ف السما من غير جناح ولا ريش
عُرسه هناك في جنان الخلد والفردوس
نشوان تزفه الملايكة بالفرح والتبشيش
27
في قلب سِـن القلم متغربة الكلمة
والحرف فوق الورق بتحوّطه الضلمة
فضفضلي قول يا قلم يمكن تريحني
وأريحك م الألم ونخفف الصدمة
28
لـ فين واخدني يا بحر بموجك الغضبان
سفينتي في مَيِّتك سايرة بغير رُبان
وانا لا بارع ف فن العوم ولا بحار
ولا انتا ناوي تقرَّب ناحية الشطآن 29

ناس فوق ف سابع سما وناس ف سابع أرض
تفرق كتير إنما عايشين بطول أو عرض
لا قلت فيه مظلمة ولا قلت فيه تفريق
دي سنة الحق فينا بس التراحم فرض
30
بِعنا نهارنا بليل أسود كئيب حالِك
وبنينا لَجْل الفساد بُلدان ومَمَالِك
حاولت اصلّح عيوب الناس قالولي
خليك ف حالَك وسيب المُلك للمالِك
31
يرحم زمان الشهامة ونخوة الفرسان
والتضحية والكرامة وغيرة الجدعان
ياللي امتطيت الحصان وتحسب انك بطل
لو يوم يخاطبك يقول انزل كفاية امتهان
32
لو يوم نحاول نجرب إننا نسامح
نصفا ف ساعة رضا ومع بعض نتصالح
هنعيش سوا في محبة و تنتهي الأزمات
أصل المسامح كريم ، والكريم رابح
33
يحرم عليا الهوى بعدِك يا روح الروح
ياللي هواكي مَلَك قلبي منين ما باروح
إن كنتي إنتي هاتنسيني أنا مانسى
هافضل أسيرك أنا حتى طلوع الروح
34
تاهت خطاوينا ف وسط الدنيا الكدابة
ماحناش عارفين مين غَيَّرنا بقينا ديابة
ناكل لحمنا نهتك عرضنا من غير رادع
ماحناش راحمين وسطنا مساكين ولا غلابة
35
يصعب عليا القلم لما يصير أبكم
والسطر يصبح غريب لما السكات يحكُم
ملعونة يا غربتي ف بيتي وكئيب يا فراغ
مسجونة يا كلمتي وريحة الخَرَس تِزْكِم
36
نامت عيون اللي خالي البال وانا سهران
عشقت عدّ النجوم وغرقت ف الهذيان
ياللي تلوم السهارى وانتا ماتدري
العشق ليه سطوته العشق ليه سلطان
37
زي السراب الدنيا تخدعنا كتير
نِجري عليها ، نروحلها ما نلاقي خير
نندم ساعتها بس يا خسارة خلاص
ضاع عمرنا ف الخدعة والوهم الكبير
38
حضرة جناب المحترم ياللي اسمك العربي
إمتى تفوق م النوم بقى ، إمتى تكون عصبي
وتثور ف وش المعتدي وتحطم الأسوار
إنتا رضيت بالذل يهدم دنيتك ؟ عجبي !!!!
39 يا غراب بينعق ف الوشوش وشوشني بالراحة
شرشر شرارك ف الهشيم والشمس لفاحة
مشبوك بمشبك شراعي اللي اشتفى م الشر
شكشكني شوكك مشيت و شفايفي نواحة